Tigsik sa pagkakan

Tigsík ko an mga kakánon
pag sindá sìmong pagparapahaláton
ika saindáng gugutúmon

(Si Mayor Emmanuel Requejo kan Canaman, Camarines Sur kan napaagi sa SM City Naga Foodcourt mantang ginigibo an sarong SM Bloggers Event)

Si Sheila Basbas, iyo an nanggana kan cellphone sa pa-raffle, sa karahayang-boot kan P. Aldana Cellphones. Mantang an mga blogista pigtaràwan man nin giftpacks.

Tios

nagpapataragásan
an nagbuburok-burok
na tulák, saká an
matapóng beinte pesos

kun siisáy an matágal--
na daí makatalingkás
sa labót na bitúka
sagkód bàbang bulsá

daí matitíos kan kwarta
an kagutóman, alágad
bakô an, kapasloán
sa pirak kan hawak

Pagromdom nin bitoon

pakatapos magbilar sa nagpaaram na barkada

salámat bitóon
sa silyáb na iginirà mo
sa kalangítan kan banggí
masirám na pamatì
magaya-gayang pagmatì
sa pagromdóm kan hamís
mantáng naghihídaw
an sakóng kinàban
na kaidtó saímo man
dai nin pagkalangkág
an sakóng kalág, ta iká
nakapulî na mantáng akó
papulì na man

O Duros!

Sa mga
oras, na iká hinahapò
kokosogán ko
an sakóng paghángos
tangárig daí nindá madangóg

pag nagtonínong na
an gabós, sasabayán
takáng maghángos
nin makosóg
kugos-kugos

padágos na kokosogán
an paghapíyap
sa saímong daghán

hohopogón an kosóg
na mapapósog
kan saímong pusò

isusumpáy iníng hinángos
sagkód na maampós
an saímong pagmàwot

sagkód na sakóng maparóng
an mahamót mong amyó
sa maimbóng na huyop
o duros!

-------------
mabalos, paraam saimo fae.

marso 7, 2010 11:03 nin aga

Monumento

konteng karatula
konteng lapida
programa

konteng igib
konteng dilig
patubig

konteng asin
konteng marjarin
feeding

konteng sim
konteng dingding
hawsing

konteng kalsiyum
konteng ayron
nutrisyon

konteng twisyon
konteng leksyon
edukasyon

konteng kwalifikeysyon
konteng koneksyon
promowsyon

konteng kompyuteysyon
konteng manipyuleysyon
reeleksyon

Paghamil sa Sadiring Lustab

Pinúgol kong iluwâ
an sakóng laway na sakô
kutâ nang ikukuspâ

Asín nangágin akóng
sarô sa saindá--
dustâ!

Nagtataragók
kun nakakaparóng--
manàgom.

An Lagayláyan

An lagayláyan bàgo magdiklóm, marumárom
mga pangadyíon nangangapódan, naglaláom
sa pagdatóng kan banwáan, nagpapagiromdóm

Nagkakaralay-kalay, nakasarabláy
banderitas nin duwáng kulay, tagawaráng bubláy
putî, bugháw, inirorokyáw an Mariang wayáway

Makobál na palitadang nakokodalan nin palàpâ
may duwáng linyang palabà, putíng ekis na dakulà
pantandâ sa waláng bitís, mga matáng natutungkâ

Sinurogpón na mga telon, iyóng pamandóng
lindóng kan mga paradalán asín dadalanón
itóm na krus sa gapóng arko nakasírong

• An mga Para-Lagaylay
• An mga Paradalan nin Lagaylay

Retrato ni Greg Sto. Tomas

Puyat

luntók
na, turog

na
daí mo na
giráray titìnohón
an sakóng kinàban
maghápon

siring kasuodmâ

dyatà

mabatî na namán
saná akó, dawà pa
magdiklóm

dawà pa, ako na man
an magpúyat
atyán

arambilí

Kinsenas-Kataposan

Oróg na nadadangóg
an matanóg na tingog
nin si bàgong magdatóng
na sweldong sensilyohon
kinse man na maghápon
kun pagtipon-tipónon

Alágad daíng giróng
abáng hamót pagparong-
paróngon, abáng lagtóng
pagkirisì-kisíon
kan kokobrahon lambáng
Kinsenas-Kataposán

Apat na Gatos na Taon na Nakagamot sa Oosipon

"¿Que lugar este?"
"Kanâ man."

Olay
Osip
Olay-olay
Osip-osip
Orólay
Orósip
Oroorólay
Oroorósip
Orolay-olay
Orosip-osip
Olayón.
Osipón, orosipón, oosipón.